Мареска со специјална пофалба за еден играч на Челси: Тој е најдобар во светот на својата позиција!

Челси оствари тешка победа на Тотенхем и доби уште едно важно лондонско дерби, а освоените три бода значат дека тимот се враќа во посакувана зона на табелата.

Во битката за топ четири, Челси во овој момент повторно дојде пред Манчестер Сити, па иако победата над Тотенхем ја осигура Енцо Фернандез, според Енцо Мареска, клучна улога во остварениот триумф повторно одиграл тивкиот херој.

Менаџерот на Челси подели низа комплименти за Моисес Каиседо, кој според него со актуелната форма е најдобар дефанзивен играч за врска.

– Во овој момент, тој е еден од најдобрите, ако не и најдобар дефанзивен играч за врска во светот. Игра фантастично, но за мене поимпресивно е тоа како работи секој ден. Тој е многу сериозен, неверојатно понизен и скромен, а истовремено и извонреден на личен план.

– Повторно имаше исклучително добри перформанси и ни помогна да победиме. Целиот тим беше добар, но Каиседо ни го носи потребниот мир во дефанзивен поглед, – посочи Мареска.