Мареска со сериозен комплимент за англиски напаѓач: Тој е подобар од Кејн и Руни

Челси денеска му гостува на Лестер во првиот натпревар од саботната програма во Премиер лигата, а гостите посакуваат победа по пауза од две кола во кои беа освоени само два бода.

Менаџерот Енцо Мареска го најавил овој натпревар изразувајќи посебен респект за „лисиците“, но и нивната најголема ѕвезда Џејми Варди.

Италијанецот толку го почитува искусниот фудбалер, што потенцирал дека тој е најдобар англиски напаѓач во својата генерација.

– Варди е фантастичен фудбалер, луѓето не се ни свесни за каков квалитет станува збор.

– Знам дека Англија секогаш имала добри напаѓачи, како Кејн, Руни и други, но ако ме прашувате мене, Варди е број еден.

– Може да прави различни работи на различни позиции, но она што е најважно е неговиот менталитет. Може да паузира неколку недели, да не тренира, но кога ќе дојде натпревар, тој ќе биде фудбалерот кој ќе постигне гол, – рекол Мареска.