Марбери: Погрешен човек ја доби МВП наградата

Селекцијата на Соединетите Американски Држави успеа да остане на тронот на светската кошарка и да го одбрани олимпиското злато во Париз.

Американците мораа добро да се испотат за да потврдат дека се најдобри, па така во полуфиналето мораа да прават голем пресврт во соочувањето со Србија, додека во завршниот меч го имаа неверојатниот Кари кој во четвртата четвртина правеше чуда, даде луди тројки и не дозволи кам-бек на Французините.

На крајот наградата МВП заврши во рацета на Леброн Џејмс, одлука со која многумина не се согласуваат меѓу кои и Стефон Марбери, некогашниот ас на Њујорк, Бостон, Минесота, Њу Џерси и Феникс и екс американски репрезентативец.

-Му ја доделија наградата МВП на погрешен човек. Можеби по грешка го извикаа неговото име. Во репрезентативната кошарка, ако не знаеш да шутираш, топката не може да биде во твои раце на крајот од натпреварот.

-Разбирам дека Леброн е „кралот“ за многумина, но ќе го кажам ова – кога ќе му го дадете она што не го заслужува, во основа велите дека треба да биде награден на големата сцена за она што го направил во минатото. Не, овој пат не го заслужи, -порача Марбери кој во свое време беше еден од најекплозивните плејмејкери.