Манев: Ова се тешки денови, но ќе играме во чест на оние кои никогаш нема да ги заборавиме

Македонската фудбалска репрезентација ги интензивира подготовките во пресрет на квалификациските натпревари со Лихтенштајн и Велс, а желбата за успех и амбициите за воведните дуели се помешани со тагата поради големата трагедија која се случи во Кочани.

Дефанзивецот Јован Манев во својата изјава најави дека тој и колегите ќе играат во чест на оние кои прерано ги загубија животите пред неколку дена во неговиот роден град.

– Ова се тешки денови за мене и сите нас.

– Изгубив, изгубивме блиски пријатели, но тие би сакале да бидеме овде и да се бориме за нашата земја и репрезентација.

– Ќе ни недостасуваат многу и никогаш нема да бидат заборавени и затоа ако ми се укаже шанса, ќе го дадам максимумот за сите нив.

– Ова е шанса да покажеме карактер и сплотеност и така да постигнеме резултати, пред се во нивна чест, – истакнува Манев.