Манчини со чудна изјава по „петардата“ во Германија: Очекував ваков пораз!

Италија успеа за малку да ја подобри сликата во последниот дел од натпреварот со Германија поради постигнатите два гола, иако конечниот резултат во најмала рака не е добар за актуелниот европски шампиони.

„Аѕурите“ загубија 5:2 од Германија на нејзин терен и потврдија дека се наоѓаат во сериозен процес на транзиција, а наспроти критиките кои ги добиваат фудбалерите од домашната јавност, на чудење наиде и изјавата која ја даде селекторот Роберто Манчини.

Италија минатата седмица ремизираше со Германија на домашен терен (1:1), но Манчини вели дека тогаш всушност очекувал исход како оној синоќа во Менхегладбах.

– Научивме некои многу важни работи. Очекував да загубиме на ваков начин пред натпреварот. Никој не сака да загуби, посебно не со 5:2, но ова е дел од процесот. Мора да минеме низ овој процес. Лошо се браневме како тим, остававме простор на Германците и пристапот беше лош.

– Мислев дека вака ќе пројдеме против Германија и на првиот меч во Болоња. Мора да прифатиме дека ќе има вакви натпревари во блиска иднина, Германија во моментов е на друго ниво, разликата е преголема, – вели Манчини.