Манчестер Јунајтед платил мало богатство за менаџерската смена

Раководството на Манчестер Јунајтед го ангажираше Рубен Аморим на местото на Ерик тен Хаг, а оваа менаџерска смена го чинела клубот мало богатство.

Порталот „Атлетик“ денеска објави подетални информации за отштетата која им е исплатена на веќе поранешните членови на стручниот штаб, како и отштетата која „црвените ѓаволи“ ја платиле за Аморим.

Тен Хаг и неговите соработници заедно инкасирале 10,4 милиони фунти поради предвременото завршување на соработката, односно отказот добиен од Манчестер Јунајтед, а најголем дел од таа сума ќе заврши на сметката на менаџерот.

Следниот чекор беа преговорите со Спортинг, а португалскиот клуб заработил 11 милиони фунти само за да даде зелено светло за тренерот Аморим да се пресели во редовите на премиерлигашот.

Во анализата на медиумот се потенцира дека по заминувањето на Алекс Фергусон во 2013 година, Јунајтед само за менаџерски назначувања и откази има исплатено околу 70 милиони фунти.