Манчестер Јунајтед донел конечна одлука за Чилвел

Манчестер Јунајтед и Челси деновиве биле во комуникација поради евентуална трансфер соработка во финишот на преодниот рок, но барем засега нема посебен оптимизам дека двата клуба ќе реализираат нешто конкретно.

Евентуалната размена на Џејдон Санчо и Рахим Стерлинг делува како нереално сценарио, а нема да има ништо и од идејата на Челси да го испрати Бен Чилвел во редовите на големиот ривал.

Челси се обидел да го испрати повремениот англиски репрезентативец на „Олд Трафорд“ мотивиран од честите отсуства на Лук Шо, но раководството на Јунајтед и менаџерот Ерик тен Хаг решиле дека подобра опција е да ја пополнуваат евентуалната „дупка“ со актуелни членови на тимот.

Јунајтед не бил задоволен ниту од сумата која Челси ја барал за бекот, па со тоа и дефинитивно пропаднала опцијата со која Чилвел можеше да го облече дресот на „црвените ѓаволи“.

Челси има многу фудбалери кои не се во комбинација кај менаџерот Енцо Мареска, но Чилвел е еден од најкомплицираните случаи поради возраста и пред се поради високата плата која ја добива фудбалерот.