Македонско дерби во четвртфиналето на шкотскиот Лига куп

Бојан Миовски ја напушти Шкотска, но во оваа земја Македонија има уште три претставници кои денеска имаа свој настап во Лига купот, а ждрепката им закажа и соочување во следната рунда.

Давид Бабунски и Кристијан Трапановски беа стартери за Данди Јунајтед во осминафиналниот дуел со Ст.Мирен, а Давор Здравковски исто така почна од првата минута и одигра 60 од 120 минути колку што се играа на средбата меѓу Мадервел и Килмарнок.

Македонскиот тандем во Данди Јунајтед беше повлечен од игра во последните петнаесетина минути кога нивниот тим водеше со 1:0, а соиграчите го задржаа водството до самиот крај.

Мадервел мораше да игра дополнителни 30 минути иако имаше играч повеќе, а соиграчите на Здравковски реализираа во 96. минута преку Ебије за конечни 1:0.

Ждрепката за четвртфиналето е одржана веднаш по комплетирањето на фазата, а Мадервел и Данди Јунајтед ќе бидат противници во оваа рунда. Селтик ќе игра со Фалкирк, што значи дека го избегна најголемиот ривал Глазгов Ренџерс, чиј противник ќе биде тимот на Данди. Абердин во четвртфиналето ќе се соочи со четвртолигашот Спартанс.

Натпреварите ќе се играат на 21 и 22. септември.