Македонските тенисери ја остварија целта: Ја победија Молдавија и отидоа едно скалило погоре во Дејвис купот

Македонската Дејвис куп репрезентација успеа да отиде едно скалило погоре и се пласираше во третата европска група, откако денеска оствари трета победа на четвртата пресметка која се одигра во главниот град.

Поразот од Сан Марино од 2:1 не влијаеше негативно врз нашите тенисери, кои денеска успеаја да ја победат Молдавија и со тоа го заверија својот пласман во третата Дејвис куп зона.

Калин Ивановски славеше со убедливи 6:1, 6:1 против Андреј Горба, Горазд Србљак беше уште поубедлив против Максим Казак со 6:1, 6:0, па предадениот меч во игра на двојки немаше никаков значење врз конечниот епилог.

Пред денешниот трумф, македонските тенисери славеа над Косово и Андора, а единствениот пораз го претрпеа од селекцијата на Сан Марино.

Како домаќините на турнирот кој се играше во тенискиот клуб „Југ“, мора да се заклучи дека ја остваривме крајната цел, односно се пласиравме во поконкурентна група во Дејвис куп поредокот.