Македонските каратисти освоија два златни медали на Универзијадата во Полска

Македонската универзитетска карате репрезентација денеска успеа да го освои златниот медал во најтешката дисциплина борби мажи екипно, а успехот беше надополнет и со златен медал на Давид Петков во поединечна конкуренција.

Македонија освои прв златен медал на една европска Универзијада во екипна конкуренција, а успехот го постигнаа со четири победи следните репрезентативци: Петар Заборски, Петар Спасеновски, Давид Петков, Глигор Петков и Димитар Илиевски.

Во Финалната борба нашиот тим беше поуспешен од Украина и ја совлада со резултат 3-1.

– Постигнавме голем резултат, за прв пат на една европска универзијада Македонските карате спортисти во екипна конкуренција се на највисокиот пиедистал. Задоволството е огромно во целиот тим. Екипниот медал е секако најтежок за освојување и затоа сите многу сме среќни.

– Успехот за сите нас е поголем бидејќи репрезентативецот Давид Петков успеа и во поединечна конкуренција во тежинската категорија -67 кг да освои златен медал и заедно со бронзата на Ангела Мојсовска во категоријата – 68 кг, не прави да бидеме многу горди. Вкупниот биланс на освоени медали од оваа универзијада за Македонија се 2 (две) златни медали и 1 (еден) бронзен медал, – изјави Бошко Заборски, селекторот на репрезентацијата на Македонија.