Македонските кадети не го искористија одличниот старт против Грција

Македонската кадетска ракометна репрезентација денеска доживеа минимален пораз од Грција (26:25) во разигрувањето на Европското првенство во Црна Гора, со што ја задржа неизвесноста околу опстанокот во елитното друштво.

Македонските надежи добро го почнаа натпреварот, стигнаа до плус пет, но на полувреме имаа водство само со 11:9.

Грците направија целосен пресврт во продолжението и до крајот ја задржаа предноста, обезбедувајќи си минимална победа во големото балканско дерби.

Митев со 6 и Илиевски со 5 голови биле најефикасни во македонскиот состав.

Денешниот пораз беше прв во разигрувањето како дел од втората фаза на ЕП, а по ваквиот епилог, останува да атакуваме на победа против Италија за задржувањето на посакуваниот статус. Натпреварот ќе се игра во четврток од 12 часот.