Македонија доцна се разбуди против Украина и стави крај на кошмарниот квалификациски циклус

Подмладената македонска кошаркарска репрезентација ќе мора сериозно да работи и напредува во наредниот период, бидејќи лошиот квалификациски циклус за Светско првенство го завршивме со нов пораз, шести на шест натпревари.

Македонија беше однапред отпишана против Шпанија пред неколку дена и високиот пораз не беше изненадување, но сепак потајно сите се надеваа дека избраниците на Бајиќ ќе ја запишат првата победа денеска против Украина на домашен терен во „Борис Трајковски“.

Наместо тоа, „црвено-жолтите“ претрпеа нов пораз, па на тој начин за заокружува навистина неповолниот квалификациски циклус кој јасно става до знаење дека пред стручниот штаб и тимот е сериозна работа.

Кошаркарките на Бајиќ имаа ужасно влегување во мечот со Украина, па иако на крајот се разбудија, враќањето беше задоцнето и претрпевме пораз од 68:73.

Негативата од 21:35 по првата четвртина беше јасен сигнал дека не чека ново кошаркарско разочарување, па иако во вториот и третиот дел се поправивме и ги добивме тие периоди со 16:12 и 16:10, сепак не успеавме целосно да се вратиме во клучниот период. Украинците одолеаја и се изборија за трета победа во овој квалификациски циклус, втора над нас.

Младиот Андреј Јакимовски со 17 поени и 9 скокови беше најдобар во нашиот тим, 15 поени реализираше капитенот Стојановски, а 13 Бојан Крстевски. Во победничкиот табор, најдобар беше Свијатослав Михаилиук со 24 поени.