Мајами повторно го загуби малерозниот Смит до крајот на сезоната

Мајами Хит вчера го победи Бруклин со 110:95 и ја прекина серијата на порази во НБА лигата, но „жешките“ не можеа целосно да се израдуваат на овој триумф.

Причина за тоа беше незгодната повреда која ја заработи Дру Смит, а лекарските прегледи за жал покажале дека истата е од најсериозен можен карактер.

Малерозниот Смит ја скинал ахиловата тетива и ќе мора да подлегне на нов оперативен зафат, што значи дека НБА сезоната за него е завршена.

Ова е трета сезона во низа која Дру порано ја завршува поради повреда, што дефинитивно го прави еден од најнесреќните играчи во НБА лигата во последните неколку сезони.

Смит беше еден од најдобрите поентери на Мајами на претходните два натпревари против Орландо и Оклахома, но оној против Бруклин го заврши после само седум минути на паркетот.