Мајами го понижи Лејкерс во НБА лигата, тренерот Редик бесен: Ова е засрамувачки (Видео)

Лос Анџелес Лејкерс имаше позитивен старт на сезоната и ги затна устите на голем дел од критичарите, но дежурните експерти сега имаа голем број на аргументи за повторно да се исмеваат со тимот на Џеј Џеј Редик.

„Езерџиите“ рано утрово го претрпеа најтешкиот пораз од стартот на сезоната и жестоко настрадаа на гостувањето кај Мајами, каде „жешките“ успеаја да издоминираа во натпревар во кој славеа со 41 разлика.

Конечниот резултат 134:93 е најдобар приказ за тоа што се случуваше на теренот, а шокиран од конечниот епилог остана и тренерот Редик.

– Јас сум засрамен, сите сме засрамени. Ова беше засрамувачки настап од сите нас. Не покажавме адекватна борба на теренот, немаше професионализам каков што се бара во НБА лигата.

– Јас ја имам најголемата одговорност за овој болен пораз, чувствувам како мојот тим да нема заедништво на теренот, – изјави Редик кој го претрпе шестиот пораз на последните осум меча во НБА лигата.

Мајами со тимска игра го разби Лејкерс и најдобар поединец беше Хиро со 31 поен (9 тројки),  додека Леброн Џејмс залудно имаше добри бројки и неговите 29 поени остануваат во сенка на засрамувачкиот пораз.