Магијата на Луис Алберто го реши дербито на „Олимпико“ (Видео)

Големото дерби меѓу Лацио и Јувентус беше мирно и тивко до самата завршница на првиот дел, кога во краток временски интервал видовме две проверки од ВАР, но и два погодоци.

Играчите на Јувентус беа убедени дека Милинковиќ-Савиќ направи прекршок над Сандро пред да постигне гол, но главниот судија Ди Бело процени дека станува збор за премал контакт и голот остана да важи.

Лацио дојде до заслужено водство со оглед на иницијативата која ја имаше, но Јувентус експресно одговори и во првиот посериозен напад израмни преку Французинот Рабио.

И овој гол се прегледуваше поради мешаницата во шеснаесетникот на Лацио, но исто како и првиот пат, погодокот беше признат и на семафорот стоеше 1:1 по 42 минути игра.

Со овој резултат се замина на паузата, а во вториот дел како клучна се покажа магијата на Луис Алберто. Шпанецот прими пас од десната страна од Андерсон, но веднаш ја проследи топката со „штикла“ и маестрално го проигра Закањи кој подоцна при радоста му ги „бришеше копачките“ на асистентот.

Лацио благодарение на овој фантастичен гол победи со 2:1 и се зацврсти на второто место на табелата во Серија А.