Лукман: Немавме среќа, покажавме дека можеме да се носиме со Реал

Аталанта во еден возбудлив и динамичен меч доживеа минимален пораз од Реал Мадрид од 3-2 во Лигата на шампионите.

Калчолигашот и покрај тоа што во еден момент губеше и со 3-1 покажа карактер, не се предаде и на крајот малку фалеше и да дојде до 3-3 ако Ретеги го реализираше зицерот во судиското продолжение.

-Тежок меч, ги искористија шансите кога ги имаа. Знаевме каков натпревар ќе биде, немавме среќа, но имаме кренати глави. Разочарани сме од резултатот бидејќи чувствувавме дека можевме повеќе, но има и гордост. Покажавме дека можеме да се натпреваруваме против тим полн со шампиони. Секако, имаше моменти кога можевме подобро, но верувам дека денеска застанавме наспроти Реал и тоа е важно за нашиот раст, -порача Адемола Лукман кој беше стрелец на вториот гол за домаќините.

-Создадовме шанси, има многу позитиви работи да земеме од настапот, но и многу работи што можеме да ги научиме. Ова е уште еден голем чекор за нас денес, покажавме квалитет во моменти и можеме многу да научиме од денес. Не смееме  премногу да се опуштаме, ние сме во Лигата на шампионите, добро работиме во Серија А и мора да продолжиме, -додаде Нигериецот.