Лукаку не реализираше пенал, Распадори го урна „бункерот“ на Венеција (Видео)

Наполи го продолжува ловот на Аталанта и ја заврши 2024-та година со нова победа во Серија А, па така новата 2025-та ќе ја пречека како второпласирана екипа на табелата, со ист број на бодови како „Ла Деа“ (41).

Тимот на Антонио Конте направи се што е во негова моќ за да победи против целосниот аутсајдер Венеција, со тоа што мора да се признае дека се изнамачи за да го скрши отпорот.

Ромелу Лукаку пропушти да ги направи работите полесни за домаќините со нереализираниот пенал во првиот дел, ситуација во која клучна беше одбраната на Станковиќ.

Ова го натера Наполи уште поофанзивно да го нападне противничкиот гол во второто полувреме, а по една акција која не ветуваше многу во прв момент, топката среќно стигна до Распадори кој од непосредна близина погоди за 1:0.

Погодокот на резервистот се покажа како клучен за минималната победа, по која Наполи го мина Интер и се израмни на врвот со Аталанта.