Лукаку со посебни амбиции: Може да сруши рекорд стар 22 години поставен од големиот Роналдо

Вечерва со почеток од 21 часот се игра финалето од Лига Европа во кое ќе се сретнат екипите на Интер и Севилја.

Иако Севилја е позната како владетел на ова натпреварување, Интер според букмејкерите е благ фаворит за победа на оваа средба.

Во фокусот на спортската јавност на овој натпревар ќе биде Ромелу Лукаку кој зад себе остава неверојатна дебитантска сезона во дресот на Интер.

Белгиецот со вкупно 33 голови го брка рекордот на легендарниот Бразилец, Роналдо кој пред 22 години во својата деби сезона постигна 34 погодоци.

Интересно е што тогаш Интер го освои Купот на УЕФА, а Роналдо 34 погодок го постигна токму на финалниот натпревар против Лацио.

Навивачите на Интер не би имале ништо против да се повтори истото сценарио од сезоната 1997/98 кога „нероазурите“ ја освоија титулата во второто по ранг натпреварување во Европа.