Луис Енрике објасни зошто стоперот ја грее клупата: Ситуацијата на Шкриниар може да се промени само во еден случај

Милан Шкриниар пристигна во ПСЖ како голема ѕвезда од редовите на Интер, па иако се очекуваше да биде лидер во одбраната на „светците“, ситуацијата на Словакот изгледа се повеќе загрижувачка од месец во месец.

Откако го загуби своето стартно место на крајот на минатата сезона, Шкриниар продолжува да биде во втор план кај тренерот Луис Енрике и во првата фаза од новата кампања, па популарниот Лучо сега доби прашање што се случува со некогашниот столб во одбраната на Инѕаги.

Шпанскиот стручњак тврди дека нема ништо лично против фудбалерот и дека носи одлуки според перформансите кои ги гледа на тренинзите, па едноставно во овој момент им дава предност на Маркињос и Пачо.

– За мене неиграњето на Шкриниар е нормален процес во еден тим. Кога не играте, нормално е да бидете помалку задоволни.

– Сите играчи знаат каква е мојата практика. Јас сум многу искрен и сите знаат дека треба да се изборат за место во тимот. Ако видам работи кои ми се допаѓаат на тренинзите и натпреварите, може да се промени ситуацијата на Шкриниар, – вели Луис Енрике.