Лотито за потенцијалното финале со Рома: Ако добро се сеќавам…

Лацио и Рома се два жестоки ривали од Италија, два клуба од ист град кои играат на ист стадион, па едно нивно европско финале би било вистински спектакл.

Имено тоа е возможно оваа сезона во Лига Европа, натпреварување во кое двете екипи забележаа победи над Плзен и Атлетик Билбао во првите мечеви од осминафиналето, па ако ја минат оваа рунда и потоа бидат успешни во четвртфиналетото и полуфиналето, тогаш можат да се соочат на 21 мај на „Сан Мамес“ во Билбао.

Околу ова потенцијално сценарио се огласи претседателот на лацијалите со порака во негов стил.

-Дали се плашам од европско финале против Рома? Не се плашам од ништо. Ако добро се сеќавам, имаше финале на Копа Италија на 26 мај [2013] во кое Лацио беше главниот лик на теренот и го освои престижниот трофеј. Ако слично сценарио треба да го доведе италијанскиот фудбал во центарот на вниманието и да придонесе за подобрување на рангирањето, тогаш нека биде, -рече Лотито кој порача декка неговиот тим мора да оди меч по меч затоа што има обврски и во Серија А.

-Во моментов, не треба да одиме пред себе, да видиме до каде можеме да одиме. Треба да останеме концентрирани и да одиме натпревар по натпревар, -порача првиот човек на Лацио.