Ливерпул ќе го жртвува Диаз за да доведе топ напаѓач

Екипата на Ливерпул игра одлична сезона под водство на Арне Слот, но во клубот се убедени дека ростерот може и треба да биде надграден со одредени интервенции во следниот преоден рок.

Поранешниот скаут на Манчестер Јунајтед, Мик Браун, за англиските медиуми открил дека Ливерпул ќе има јасна цел летово, а тоа е да доведе врвен напаѓач во своите редови.

За таа цел и поради конкуренцијата во нападот, клубот од „Енфилд“ е подготвен да го продаде Луис Диаз, со што заработените пари ќе ги реинвестира во класична „деветка“ од топ класа.

Колумбиецот се бори за место со повеќе актуелни играчи на Ливерпул и за него постои сериозен интерес од повеќе клубови, што значи дека „црвените“ може да сметаат на солидна трансфер сума, а потоа да бидат помоќни во својата понуда за играчот кој ќе го изберат Слот и неговите соработници.

Шпекулациите се дека во моментов изборот е Александер Исак и Ливерпул би испратил примамлива понуда до Њукасл за да го доведе шведскиот репрезентативец, кој би му помогнал на тимот да биде поопасен во офанзива наредните сезони.