Ливаја ја напушти хрватската репрезентација по вчерашниот инцидент

Фудбалерите на Хрватска нема да имаа одмор по крајот на клупската сезона, а причина за тоа е собирот кој го имаат со репрезентацијата воочи завршниот турнир во Лигата на нации.

Хрватите ќе бидат дел од Ф4 турнирот и во полуфиналето ќе ги одмерат силите со Холандија, но за оваа средба и потенцијалното финале нема да можат да сметаат на Марко Ливаја.

Искусниот напаѓач беше еден од малкумината кои се појавија на вчерашниот прв тренинг свикан од селекторот Далиќ, но на истиот се случил голем инцидент откако фудбалерот на Хајдук бил жестоко навредуван од страна на навивачите.

Во еден момент, Ливаја тргнал да се пресметува со провокаторите и во нервоза удрил едно мало дете со топка, па целиот овој немил настан на крајот заврши со заминување на Марко од тим-базата.

– За жал, после се што се случи во изминатите 24 часа, чувствувам дека ќе бидам само товар за репрезентацијата и нема да можам да го дадам мојот максимум. Верувам дека тимот не заслужува да се занимаваме со вакви работи пред вака важни натпревари. Јас нема да настапам на завршниот турнир и го напуштам тимот, а на момците им посакувам многу среќа во Холандија, се надевам дека ќе се вратат со злато, – изјавил Марко Ливаја денеска.