Лилард вели дека нема да игра ако Портланд остане без можност да се бори за плејоф

Првата ѕвезда на Портланд, Демијан Лилард, најави дека не планира да игра натпревари во продолжението од НБА сезоната, доколку неговиот тим не добие шанса да се бори за место во плејофот.

Портланд има мало заостанување зад Мемфис кој се наоѓа на последното осмо место на Западот кое води во плејофот, а раководството на НБА веќе преговара со Дизни за продолжување на сезоната на една локација на „Дизни ворлд“ во Флорида.

Во игра се повеќе опции, а онаа која членот на Портланд не сака да ја прифати е жртвување на преостанатиот дел од регуларната сезона и директно префрлување на плејофот.

– Ако се вратиме и не добиеме можност да се бориме за плејоф, јас ќе се појавувам на состаноците, ќе тренирам и работам со екипата, но ќе седам на клупа и нема да играм. Ви го кажувам тоа уште сега, – најавил Лилард.

Според Лилард, најправилно е екипите од 7 до 12 место во конференциите да одиграат некој краток турнир, по што ќе решат кои состави ќе продолжат во плејофот.

– Доколку ни речат дека треба да играме одреден турнир, тоа ќе биде перфектно. Мора да добиеме шанса да се бориме за место во плејофот, – нагласува кошаркарот на Портланд.