Лил заработил само 7 милиони евра од трансферот на Осимен во Наполи

Трансферот на Виктор Осимен од Лил во Наполи одамна активираше многу сомнежи во однос на сумите кои беа објавени од клубовите, а италијанските власти досега неколку пати ги истражуваа деталите од комплексниот трансфер.

Актуелниот претседател на Лил, Оливие Летанг, тврди дека францускиот клуб заработил само 7 милиони евра, иако трансферот беше објавен со вредност од дури 70 милиони евра.

– Чистата заработка, четворицата играчи проценети на 20 милиони евра, а всушност со многу мала вредност, заедно со провизии, достигна помалку или повеќе 7 милиони евра, – открил Летанг за „Лекип“.

Наполи испрати четворица играчи во спротивна насока, а тие никогаш не добија шанса во редовите на Лил, додека во италијанскиот клуб се бранат со фактот дека неколку истраги не обезбедиле доволно докази за обвинувањата дека се објавени вештачки бројки за вредноста на испратените фудбалери во спротивна насока.

За ваков престап, Јувентус беше казнет со одземање 10 бодови во Серија А.

Летанг стана претседател на Лил непосредно по реализацијата на трансферот на Нигериецот пред четири години.