Леверкузен киксираше пред дербито со Баерн, Ковач дебитираше со пораз на „Сигнал Идуна парк“ (Видео)

Баер Леверкузен не го одржа чекорот со Баерн Минхен пред големото дерби кое е на програмата наредниот викенд, па така избраниците на Чаби Алонсо ќе го пречекаат баварскиот ривал со осум бода помалку на табелата.

„Фармацевтите“ одиграа просечен натпревар на гостувањето кај Волфзбург и во ниту еден момент не успеаја да го наметнат своето темпо, а тоа направи да се задоволат само со разочарувачки 0:0.

Всушност, Волфзбург беше тимот кој беше и поблиску до победата, но Храдецки имаше среќа и ударот на Фишер заврши во рамката на голот.

На крајот, поделбата на бодовите му носи најдобра вест на Баерн, кој сега без преголем притисок ќе замине на гостувањето на „БајАрена“.

Ова попладне, големо внимание предизвика и натпреварот на „Сигнал Идуна парк“, каде Борусија повторно ги разочара своите фанови, и тоа на дебито на Нико Ковач.

„Милионерите“ беа далеку подобри и вистинско чудо беше како не постигнаа гол во првиот дел, а за големите промашувања стигна казна на стартот на вториот.

Автоголот на Антон и погодокот на Чабо донесоа комотна предност за Штутгарт од 0:2, по што Борусија успеа да се избори само за поблаг пораз со погодокот на Брандт.