Левандовски: Знаев што ќе следи по назначувањето на Флик

Роберт Левандовски беше еден од играчите за кои се велеше дека се на излезна врата доколку во Барселона остане Чави Ернандес, но големата промена на клупата донесе најдобри можни вести за Полјакот.

Од играч кој беше прогнозиран да оди на трансфер пазарот, популарниот Леви се претвори во клучен играч во новиот проект на Барса, пред се благодарение на Ханси Флик.

Левандовски го понуди најдоброто свое издание под водство на добриот пријател од Баерн Минхен, па сега и самиот призна дека почувствувал олеснување кога дознал кој ќе седне на клупата на Барса.

– Бев многу среќен кога дознав за веста за Ханси Флик, бидејќи знаев што ќе следи во Барселона. Работев одлично со Ханси во Баерн и немаше потреба да се запознаваме.

– Физичката работа со него знаев дека брзо ќе донесе резултат. Сега сите во тимот сме посилни. Кога имате добра физичка подготовка, нема потреба да се грижите за физичкиот напор кој ќе го почувствувате за време на еден натпревар. Сега имаме доволно сила да се натпреваруваме со било кој тим и во било која ситуација. По неговото доаѓање, секој член во клубот е на повисоко ниво, – потенцира Левандовски.