Левандовски се обидел финансиски да и помогне на Барса, Лапорта јавно го поздрави гестот на Полјакот

Барселона и покрај сите напори не успеа да стигне до правилото „1:1“ и тоа го оневозможи Жоан Лапорта да донесе повеќе засилувања ова лето, но недостигот на нови имиња засега не се чувствува во играта на каталонскиот гигант, кој на стартот на сезоната игра извонредно под водство на Ханси Флик.

Германскиот стручњак ја разбуди страста меѓу навивачите на Барса и засега има перфектен скор во Ла Лига, па Лапорта како претседател на клубот не штедеше комплименти за новиот тренер, но и за искусниот напаѓач Роберт Левандовски.

Лапорта при своето обраќање нагласи дека Флик е човек кој никогаш не бара изговори и немал ниту една лоша реакција за слабата активност на трансфер пазарот, а од друга страна откри дека Левандовски се понудил да му биде преработен договорот за Барселона да може полесно да го ребалансира буџетот за нови засилување и да може да ги регистрира играчите.

– Левандовски е помотивиран од било кога, потребен му беше нова искра во кариерата и тоа го покажува со своето залагање. Се наоѓа во многу добра физичка кондиција и гледам голема страст во неговите очи. Што е најважно, тој е многу посветен на клубот и тоа можам да ви го потврдам од прва рака.

– Кога дозна дека може да имаме подобра ситуација со фер-плејот со изменување на дел од договорите, тој дојде кај мене и ми понуди да му биде преработен договорот. Му благодарам многу за гестот, но немаше потреба да го правиме тоа. Тој е многу приврзан за клубот и секогаш има огромни барања од себе и од своите соиграчи. Сигурен сум дека ова ќе биде најдобрата сезона на Левандовски, – изјави Лапорта.