Левандовски испрати порака до Кимих за преселбата во Барселона: Тука атмосферата е поразлична…

Барселона останува без услугите на Серхио Бускетс на крајот на оваа сезона, па приоритет на новиот шпански шампион е да пронајде соодветна замена за него во летниот преоден рок.

Тоа воопшто нема да биде лесно со оглед на улогата на Бускетс низ сите овие години на „Камп Ноу“. Во јавноста, медиумите се споменуваат неколку имиња со тоа што во последно време се повеќе се нагласува германскиот репрезентативец, Јозуа Кимих.

Кимих е еден од најзначајните фудбалери на Баерн Минхен, но добар дел од медиумите пренесуваат дека Барса би имала шанси да го добие неговиот потпис особено ако тој побара да си замине од „Алијанц Арена“.

Колку е тој реална опција и дали би можел да се пресели во Шпанија ќе покаже времето, а во меѓувреме Роберт Левандовски кој добро го познава Кимих му испрати една кратка порака.

-Што би му кажал на Кимих за Барселона? Вреди тука да се дојде. Атмосферата е поразлична од Баерн. Тоа се два големи клуба, ама искуството и предизвикот е различен, -истакнал Полјакот за „Мундо Депортиво“.