Лестер му го „потпиша“ отказот на Лопетеги на дебито на Ван Нистелрој

Руд ван Нистелрој дебитираше на клупата на Лестер со победа од 3:1 во дуелот со Вест Хем, тим кој исто така наскоро може да промовира нов менаџер.

Резултатската криза на лондонскиот состав најавува отказ за менаџерот Хулен Лопетеги, а англиските медиуми се сигурни дека денешниот неуспех ќе биде пресуден за носење таква одлука.

Варди уште во 2. минута донесе водство за „лисиците“, а Ел Канус ја зголеми таа предност во 61. минута од дуелот. По еден поништен гол, сепак Дака погоди во 90. минута за потврда на трите бода, а Филкруг ги постави конечните 3:1 во судиското надополнување.

Ван Нистелрој имаше победнички старт со Лестер на премиерлигашкото деби како самостоен менаџер, а неговиот тим сега има 13 бодови или два помалку од Вест Хем.

До овој дуел, поранешниот англиски шампион немаше победа во сите натпреварувања од 19. октомври.