Лестер го надигра Челси, „лисиците“ го преземаа врвот во Премиер лигата (Видео)

Лестер трпеливо има улога на фаворит од сенка во Премиер лигата и очигледно му се допаѓа таквиот статус, бидејќи избраниците на Брендан Роџерс играат без никаква резерва и без нималку респект против било кој тим во англиската елита.

Тоа го докажаа оваа вечер на домашниот „Кинг Пауер“ каде го надиграа Челси со 2:0, а тимот предводен од Френк Лампард можеше да настрада и уште повеќе ако играчите од нападот беа поефикасни во второто полувреме.

„Лисиците“ од Лестер си ја завршијата работата во првото полувреме и ја материјализираа својата директна игра, или од друга страна пак, ја казнија летаргичната игра на гостите уште еднаш демомстрираа дека немаат никаква острина во играта.

Ендиди погоди за 1:0 уште во 6-та минута од мечот и ја направи оваа вечер за гостите од Лондон многу тешка, а пред крајот на првиот дел погоди и Мадисон за водство од 2:0.

Во вториот дел, Лестер пропушти шанси за повисока победа, додека Челси се обидуваше со полушанси, па иако постигна почесен гол преку Вернер, истиот беше поништен поради минимален офсајд. Со третата победа во низа во Премиер лигата, Лестер се искачи на врвот на табелата, па сега мирно ќе го исчекува расплетот на натпреварите кои ги играат ривалите во 19-то коло.