Легендата живее, Шибеник го прослави роденденот на Дражен

Запаметен како еден од најдобрите европски кошаркари на сите времиња, Дражен Петровиќ трагично го загуби животот во сообраќајна несреќа која се случи во 1993 година.

Денеска тој требаше да го прославува својот 51. роденден, но и покрај фактот што минаа повеќе од две децении од немилиот настан, кошаркарските фанови, посебно тие на екс-ју просторите не заборавија на 22. октомври да се присетат на кошаркарскиот „Моцарт“.

Покрај многубројните видеа со неговите потези и потсетувањето на неговите успеси, во Шибеник, градот каде што е роден во 1964 година денеска беше откриено уште едно симболично одбележје на плоштадот кој го носи името Дражен Петровиќ.

Се работи за кошаркарски патики излиени од бронза кои ќе бидат уште едно потсетување за најпознатиот спортист кој потекнува од овој град и е комплетирање на проектот во кој Дражен доби спомен соба, кошаркарско игралиште и споменик. Патиките со број 47 по кои бил направен овој мини споменик ги отстапила мајката на Дражен, Бисерка, а ги изработил скулпторот Александар Губерина.