Легендарниот шеф на Ферари се враќа во Формула 1

Поранешниот тимски шеф на Ферари, Матија Биното, се враќа во Формула 1 како главен оперативен и технички директор на Ауди по промените во раководството на проектот и заминувањето на извршниот директор Андреас Зајдл.

Биното работеше за Ферари речиси три децении, каде беше тимски шеф од 2019 до крајот на 2022 година, па по неполни две години се враќа во Формула 1 и тоа на висока позиција во идниот тим на Ауди.

Во соопштението објавено во вторникот, Ауди објави дека Биното ќе се приклучи како главен оперативен и технички директор од 1 август за да го води тимот пред нивното деби во 2026 година.

Во исто време, извршниот директор на Заубер, Андреас Зајдл и претседателот на управниот одбор Оливер Хофман го напуштаат проектот.

„Мило ми е што успеавме да го ангажираме Матија Биното за нашиот амбициозен проект во Формула 1“, изјави извршниот директор на Ауди, Гернот Доелнер.