Легендарниот Саки откри интересна анегдота и испрогнозира во кој голем клуб ќе се пресели отпуштениот Конте

Антонио Конте заработи отказ од Тотенхем и нема да го доработи договорот кој истекуваше на крајот од оваа сезона, па од минатата седмица тој веќе е во Италија и воопшто нема да се врати во Северен Лондон.

На овој начин, Конте стави крај на уште една авантура во Премиер лигата, а италијанските медиуми сметаат дека ценетиот стручњак ќе се врати во домашниот фудбал и ќе чека возбудлива понуда во Серија А.

Легендарниот Ариго Саки открива дека е заљубен во тренерските квалитети на Конте и таквиот потенцијал го препознал уште во далечната 1994-та година, од кога носи со себе интересна анегдота.

– Го сметам Конте за еден од најдобрите тренери на европската сцена, сега ќе ме задоволи само негово враќање во италијанскиот фудбал. Во него имаме тренер со многу знаење и тој ја прави разликата од клупата. Го имав како играч во 1994-та година и тогаш ми откри интерезна приказна. После секој тренинг, одел во соблекувалната и запишувал се што сме работеле на вежбите. Уште тогаш имаше менталитет на тренер, човек кој може да биде лидер на тим.

– Логичо е Конте да биде поврзуван само со големи клубови сега кога доби отказ. Тука пред се мислам на Јувентус и Интер. Особено мислам дека сега ќе му одговара да се врати во Торино. Таму освои многу како играч и веќе го освои Скудетото како тренер. Нема да бидам изненанден ако се врати во Јувентус и почне нова љубов со „старата дама“, особено кога се знае дека многумина не се задоволни од работата на Алегри. Конте е само плус за италијанскиот фудбал, – вели Саки.