Легендарниот Иниеста одбрал симболичен датум за да објави крај на фудбалската кариера

Андрес Иниеста и официјално решил да стави крај на фудбалската кариера, потег кој го повлекува многу подоцна од речиси сите членови на трофејната шпанска генерација чиј најдобар период започна пред речиси две децении.

„Релево“ утринава ексклузивно објави дека Иниеста донел конечна одлука и ќе ја соопшти на 8. октомври, датум чија симболика е бројот на дресот кој Шпанецот го носеше за време на кариерата.

Иниеста првично најавуваше дека сака да игра уште сезона и со семејството беше во Дубаи, каде ја одржуваше формата додека бараше нов ангажман, но на крајот решил да стави крај на кариерата.

Легендарниот Андрес со својот гол во финалето донесе мундијалска титула за Шпанија во 2010 година, освои две европски првенства, а со Барселона дури четири пати го крена трофејот во Лигата на шампионите.

По долгиот престој во редовите на шпанскиот великан, Иниеста настапуваше и за Висел во Јапонија и Емирејтс во Обединетите Арапски Емирати.