Легендарната Марта со мајсторија го остави Канзас Сити на Андоновски без финале во американската лига (Видео)

Канзас Сити на македонскиот стручњак Влатко Андоновски не успеа да се пласира во финалето на американската женска професионална фудбалска лига, а на патот кон завршниот меч за трофејот го запре Орландо предводен од легендарната Марта.

Тимот на Прајд имаше најдобар скор во регуларниот дел од првенството и ја имаше предноста на домашен терен, успеа да победи со 3:2 во натпревар на кој беше постигнат и еден антологиски гол, а гостинките пропуштија голема шанса за израмнување длабоко во долгото судиско надополнување.

Канзас Сити поведе со голот на Дебиња во 33. минута, домашниот тим израмни осум минути подоцна, а во 53. минута направи и целосен пресврт.

Моментот за кој сите зборуваат по атрактивното полуфинале е индивидуалниот продор и мајсторија на легендарната бразилска репрезентативка Марта, која со вистински слалом надмудри неколку играчи од одбраната и голманката на Канзас за 3:1.

Marta is simply magical🪄

This one will be on repeat forever! #NWSLPlayoffs pic.twitter.com/MZh3gJryCL

— National Women’s Soccer League (@NWSL) November 17, 2024

Избраничките на Андоновски во финишот намалија од пенал, а неколку минути подоцна Шарплс имаше голема шанса и да извлече продолжение, но не успеа да се снајде во одлична позиција за постигнување гол.