Легендарен италијански репрезентативец го врати Сасуоло во Серија А (Фото)

Фабио Гросо има статус на легендарен италијански репрезентативец поради фактот што беше дел од шампионскиот тим кој го освои Светското првенство во 2006-та година, но речиси две децении подоцна, поранешниот лев бек сега го оствари и најголемиот успех во тренерската кариера.

Гросо од самиот старт на сезоната на извонреден начин го води тимот на Сасуоло, а денеска на пет кола пред крајот на сезоната и математички беше обезбеден влез, или поточно врќање во италијанската елита.

Сасуоло минатата сезона испадна од Серија А после 11 сезони во најсилното друштво, но сега експресно се враќа онаму кадешто припаѓа, и тоа со биланс кој навистина е за голем поздрав.

Денешното реми против Мантова со резултат 2:2 значеше дека Сасуоло сигурно ја завршува сезоната на една од првите две позиции, а сега до крајот на сезоната ќе има за цел да го одбрани врвот и да ја добие титулата за најдобар тим во Серија Б.

Во досегашните 33 кола, Сасуоло оствари 23 победи, 6 реми средби и претрпе само 4 порази, а со гол разлика 73/34 е убедливо најдобар тим во Серија Б.

Гросо избори пласман во Серија А со Фросиноне пред две години, но тогаш не доби шанса да го води тимот во Серија А.

🅰️ pic.twitter.com/yLaYFukRBt

— U.S. Sassuolo (@SassuoloUS) April 13, 2025