Легенда на Ривер Плата стана нов тренер на Ал Итихад

Актуелниот шампион на Саудиска Арабија, екипата на Ал Итихад веќе има нов тренер, кој ќе го наследи Нуно Еспирито Санто.

По разделбата со Португалецот, тимот од Џеда го назначи Марсело Галјардо за нов предводник на Ал Итихад, кој изминатиот период имаше разочарувачка серија во домашното првенство.

Галјардо ја започна тренерската кариера во уругвајски Насионал, а потоа ја водеше Ривер Плата во периодот меѓу 2014 и 2022 година.

Со аргентинскиот тим освои четиринаесет трофеи, меѓу кои два во Либертадорес купот и еден во аргентинското првенство, со што се запиша во клупската историја како најтрофеен тренер на Ривер Плата.

Галјардо потпишал договор со Ал Итихад до 2025 година, па сега ќе се обиде да ја подигне формата на екипата во која меѓу другите настапуваат Бензема, Канте и Фабињо.