Легенда на Јунајтед не верува во Тен Хаг: Со него сме на милиони километри од титулата во Премиер лигата

Манчестер Јунајтед не изгледа премногу убедливо и на стартот на новата натпреварувачка сезона, без оглед на победата која беше остварена изминатиов викенд на „Ст. Мери“.

Јунајтед го победи Саутемптон во саботата и стигна до биланс од две победи и два порази во оваа рана фаза од сезоната, но доесга понуденото беше доволно за Двајт Јорк да испорача брутален заклучок за патот кој го избра клубот со Ерик Тен Хаг како менаџер.

Поранешниот голгетер не верува дека Холанѓанецот е вистинскиот човек за „црвените ѓаволи“, па повеќе од јасно смета дека клубот направи грешка што го задржа после освоената титула во ФА Купот на крајот на минатата сезона.

– Со Тен Хаг како менаџер, Манчестер Јунајтед е милиони километри далеку од титулата во Премиер лигата!

– Кога зборуваме за Тен Хаг, тоа требаше да биде човекот кој ќе не води напред. Да бидам искрен, после првата сезона сите мислевме дека тое е човекот….. Но, што се случи потоа? Успеавме да го освоиме ФА Купот, тоа е добро за клупските витрини да не останат празни, но треба да се види пошироката слика.

– Каде е Манчестер Јунајтед како клуб? Не постои идентитет на тимот, треба да се види како играме, како завршуваме на табелата, колку голови сме дале, а колку сме примиле. Процентот на постигнати голови е најлош во историјата од почетокот на Премиер лигата во 1992-та година. Тоа се факти кои мора да се истакнат, – брутално потенцира Јорк.