Легенда на Манчестер Јунајтед доби селекторска функција

Поранешниот напаѓач на Манчестер Јунајтед, Двајт Јорк, доби одговорна задача и во иднина ќе биде селектор на својата земја, Тринидад и Тобаго.

52-годишниот Јорк во минатото беше член на стручниот штаб на истата репрезентација, но сега е именуван за селектор и ќе ја предводи репрезентацијата во следниот период.

За Јорк ова е втора самостојна работа, откако претходно кратко беше тренер на австралискиот прволигаш Макартур.

Како фудбалер Јорк забележа 72 настапи за националниот тим и го предводеше Тринидад и Тобаго на Светското првенство во 2006 година, а три години подоцна ја заврши фудбалската кариера.

За време на претходниот тренерски ангажман, доживеа само шест порази на деветнаесет натпревари и го одведе тимот на Макартур до трофеј во австралискиот куп.