Лазаров: Заслужено ја поминавме оваа пречка, но…

Тимот на Алкалоид ја доби и втората пресметка со Бриксен од Италија и со тоа избори пласман во четвртфиналето на Европскиот Куп на ЕХФ.

Алкалоид на вториот дуел постигна 38 гола и со вкупен резултат 82:63 обезбеди место меѓу најдобрите осум во ова натпреварување. Тренерот Кирил Лазаров и кружниот напаѓач Марко Стојковиќ се задоволни од победата, изборениот билет за наредната рунда, но во исто време двајцата потенцираа дека има работи кои мора да поправат.

-Мислам дека заслужено ја поминавме оваа осминафинална пречка, со една брза и полетна екипа, можеби немаше противникот ротација, но тие осум до девет играчи играат квалитетно, тоа се увиде во првото полувреме. На Бриксен му фалеа два до три играчи за да издржи да се носи. Ние го скршивме мечот во 35 минута, се сврти резултатот кон нас. Во првото полувреме во дадени ситуации реагиравме пребрзо, правевме грешки и тоа мора да го поправиме во иднина, -истакна Лазаров.

-Одигравме одличен дуел. Почнавме добро, беше тесно до 35. минута. Играме брзо, ние влечевме исто, во вториот дел го вративме резултатот во наша корист. Имаме уште многу да поправаме за да го кренеме нивото, -порача пак Стојковиќ.

Ждрепката за  1/4 финалето е закажана за во вторник.