Лазаров трогнат од сцените во Дебрецин по поразот од Данска: Ова не беше филм…….

За „Дерби“ од Унгарија,
Ристе Влахов

Кирил Лазаров имаше опширна изјава пред македонските новинари кои беа присутни во Дебрецин, а како најсветла точка на целиот овој турнир сигурно ќе остане запаметена „фалангата“ која одново беше на висина на задачата и во огромен број на секој меч.

На крајот од натпреварот се виде една убава слика и репрезентативците беа испратени со аплаузи од македонските навивачи и покрај поразот од Данска, сцена која Лазаров вели дека треба да им даде потстрек да се работи уште понапорно и подобро за да се дојде до посакуваното ниво и да се одреди вистинскиот ростер на селекцијата.

Селекторот Лазаров вели дека клучна цел е да оформи тим од 20 до 22 играчи кои ќе бидат носители на секое големо натпреварување, а интересно даде одговор за тоа дали ќе и помогне на репрезентацијата како играч на претстојниот бараж за Светското првенство.

– Им реков на колегите од стручниот штаб, ние имаше нешто неверојатно, имаме неверојатно богатство. Ова не беше филм, ние имаме навивачи кои не поддржуваат толку многу години, издвојуваат средства за да дојдат на било кое место. Од срце сум им благодарен. И покрај поразот, почувствував енергија која е навистина позитивна и тоа им го пренесов на моите колеги од стручниот штаб. Ова е добар знак, а наше е да продолжиме да се бориме, да работиме и да дојдеме до ниво кога ќе бидеме конкуренти на големо натпреварување.

– Ако ме служи здравјето, ќе играм на баражот за Светското првенство. Искрено, многу се подготвував за Европското првенство и ми беше жал што не играв. Со оглед на тоа што ни се случи, добро се држевме до седмиот ден, а потоа се распаднавме. Како селектор сега имам потешка задача, треба се добро да изанализирам и во наредниот период да изберам од 20 до максимум 22 играчи кои ќе не водат на големи турнири, – изјави Лазаров.