Лазаров: Се ми стана јасно кога го видов записникот по крајот на мечот

Специјален известувач за „Дерби“ од Вараждин, Ристе Влахов

Македонија го заврши својот настап на Светското првенство со пораз од фаворизираната Франција, но и со четврто освоено место во втората фаза на мундијалот.

Избраниците на Кирил Лазаров уште еднаш покажаа полетност и храбра игра против еден од главните кандидати за златниот медал, па по поразот од 32:25, селекторот на македонскиот тим ги сумираше впечатоците од виденото на последниот натпревар, но и воопшто од настапот на целиот турнир.

Македонскиот селектор смета дека Франција е друга реалност за нашата селекција во овој момент, но во секој случај е задоволен од целокупната слика која ја остави тимот на изминатите шест натпревари.

– Во спортот секогаш можете да се надевате на чудо, но реалноста е друга. Сите видовте за каква сила станува збор, сите видовте колку Франција е потентна во секој елемент. Се боревме машки против нив, не се предадовме во ниту еден момент, бидејќи ако се предадете против Франција, за 3-4 минути ќе имате негатива од 10 или 15 голови разлика.

– Нашата младост и неискуството правеа да брзаме во одредени ситуации, промашивме чисти шутеви и можевме да извлечеме и поповолен резултат, тука го вбројувам и последниот цепелин на Кузмановски. Не е исто да загубите со шест, или со седум разлика. Во секој случај, морам да бидам задоволен од тимот, кога го видов записникот, се ми стана јасно. Мем и Ремили беа нивни најдобри голгетери, тоа значи дека воопшто не не потцениле. Станува збор за играчи кои освојуваат трофеи секоја сезона, Франција одигра максимално против нас.

– Нашите момци се бореа, ова е шести натпревар на СП и игравме против селекција која темпира форма за завршницата. Задоволен сум од целокупното издание, можеме да жалиме за тоа што го испуштивме, но тоа е од неискуство. Овие играчи од утре ќе бидат подобри на клупски план, но и на репрезентативно ниво. Следниот пат ќе бидат многу подобри на ваков турнир и нема да биде лесно да бидат победувани од било кој, – изјави Лазаров.