Лазаров и Нант сериозно ја предизвикаа Барселона, но претрпеа минимален пораз

Кирил Лазаров и неговите соиграчи од Нант сериозно ја предизвикаа моќната Барселона, а мора да се напомене дека вистинска штета е што немаа сили во зваршницата, во која дозволија пресврт и минимална победа на фаворитот во натпреварот од Лигата на шампионите.

Францускиот претставник ја диктираше играта во првото полувреме и речиси цело време одржување предност од три гола, па на стартот на вториот дел, стигна и до четири позитива и со тоа јасно стави до знаење дека ќе биде цврст орев.

Воведот од вториот дел беше добра најава дека Нант ќе може да изрежира големо изненадување, но како што одминуваа минутите, така Барселона се враќаше во игра и ја стопи негативата.

По погодокот за 22:21, Барса влезе во предност и одржуваше позитива од „плус два“, а во последната минута Нант постигна гол и ги постави конечните 30:29.

Кире Лазаров постигна три гола во пресметката со својот поранешен тим, најпрецизен во Нант беше Ривера со девет погодоци, додека кај Барса три играчи постигнаа по пет гола, Арињо, Гомеш и Дика Мем.