Лазаров го објави конечниот список: Талески останува без настап на СП, Томовски е само резерва (ФОТО)

Селекторот на македонската сениорска ракометна репрезентација, Кирил Лазаров го објави конечниот список на играчи на кои ќе смета на Светското првенство кое на стартот на наредната година ќе се одржи во Хрватска, Норвешка и Данска.

Лазаров се одлучи на овој мундијал да настапи само со играчи од домашното првенство, поточно немаме ниту еден интернационалец на списокот од 20 ракометари. Најголемиот дел се Алкалоид и тоа 12, шестмина се од Еурофарм Пелистер и двајца од редовите на Вардар 1961.

Кога ќе се погледне листата дефинитивно најголемо изненадување е отсуството на Филип Талески од Бенфика, долгогодишниот наш репрезентативец, плус го нема ниту голманот Мартин Томовски кој е ставен во групата од осум резерви.

Таму уште се и Цветан Кузманоски, Емилијан Ѓорговски, Филип Николов, Самоил Ристевски, Марио Танкоски и Михаил Аларов.

Само за потсетување Македонија во првата фаза ќе ги одмери силите со Холандија, Унгарија и Гвинеја во Вардаждин.

Првиот собир е закажан за 22. декември од 07.30 часот во хотелот Александар Палас во Скопје.