Лазаров е неприкосновен на врвот во историјата на ЛШ, Дибиров на четврто место (Фото)

Најголем дел од ракоментите првенства во Европа прогласија крај на сезоните во исчекување на подобри денови, а бидејќи на подолго време се одложени и натпреварите кои ги организира ЕХФ, ова време е најпогодно за објавување на историски статистики, споделување на незаборавни моменти и нагласување на најдобрите.

Токму во оваа насока е последната објава на Европската куќа на ракометот, која одлучи да ги наброи осумте најдобри стрелци во историјата на Лигата на шампионите. Македонскиот „бомбардер“ Кирил Лазаров е неприкосновен на врвот и има посебно место на пиедесталот со дури 1.332 гола во најелитното натпреварување, што го прави убедливо најдобар стрелец во историјата на Лигата на шампионите.

Втор на вечната листа е неговиот поранешен соиграч од Барселона, Никола Карабатиќ, но Французинот има речиси 300 голови помалку, или точно постигнати 1.074. Како трет на ранг листата се издвојува Момир Илиќ со 969 гола, а четврт е Тимур Дибиров со постигнати 884 погодоци во Лигата на шампионите.

По играчот на Вардар, следуваат Марко Вујин (841), Сергеј Рутенка (838), Микаел Хансен (821) и Ласло Наѓ со 806 голови кои ги постигна како играч на Веспрем.

Инаку, Кире Лазаров настапуваше во најелитното натпреварување со различни клубови во својата богата кариера, а животниот сон си го оствари кога ја освои титулата како член на Барса.