„Лавовите“ продолжија да „гризаат“ и остварија петта победа во низа во домашното првенство

Македонија Ѓорче Петров е друг тим откако на тренерското кормило пристигна Муарем Бајрами, па така ова попладне „лавовите“ стигнаа до петтата последователна победа во Првата македонска фудбалска лига, трета на стартот од вториот дел од сезоната.

Тимот од населбата на излезот од Скопје ја потврди фантастичната форма во донашното првенство, но истовремено се реваншираше за болниот пораз од Брегалница во првиот дел од сезоната.

„Лавовите“ тогаш загубија со уверливи 4:1, но денеска ја оправдаа фаворитската улога на свој терен и го победија тимот од Штип со резултат 2:1.

Поранешниот вардарец Попзлатанов го отвори резултатот за водство до 1:0 на „црвено-жолтите“, а повратниот Кристијан Стојкоски погоди за 2:0.

Доскорешниот играч на Работнички го постигна првиот гол за матичниот клуб на третиот меч по враќањето, па истиот беше и клучен за победата која беше остварена со примен гол.

Брегалницата се врати на стартот на вториот дел преку Ѓокиќ, но тоа беше недоволно за да се освои барем бод во Скопје.