Лапорта застана зад Чави: Во овој момент…

Барселона имаше неколку проблематични настапи во низа во изминатиов период, натпревари далеку под нивото што секако донесе огромни критики пред се на сметка на тренерот Чави Ернандес, но и прашања дали тој е вистинскиот човек за шпанскиот великан.

Барса беше непрепознатлива на соочувањато со Реал Сосиедад на кое на крајот успеа да слави, ама потоа одигра уште полошо против Шахтјор Доњецк и загуби со 1-0 во Лигата на шампионите. Потоа дојде средбата со Алавес на која исто екипата покажа многу слабости, особено во првиот дел за да по паузата шпанскиот првак заигра подобро и направи целосен пресврт (2-1) и стигне до посакуваниот резултат иако одново на крајот одново излегоа на виделина некои недостатоци.

Како ќе играат каталонците по репрезентативната пауза останува да видиме, но она што е многу јасно е дека тренерот Чави ја има максималната поддршка од водечките луѓе на чело со претседателот Жоан Лапорта.

-Сакам да кажам многу јасно, исто како и [спортскиот директор на Барса] Деко и директорите на мојот одбор, ние сме целосно на страната на нашиот тренер и сме горди што го имаме Чави како тренер за неговиот професионален и човечки квалитет. Овде ние сме тесно поврзана група, ги зближуваме редовите. Во овој момент е многу важно да бидеме заедно, -порача Лапорта.