Лапорта се огласи за иднината на Куман пред „финалето“ со Кадиз

Барселона вечерва му гостува на Кадиз во последниот меч со кој ќе биде затворено шестото коло во Примера, а кој според јавноста во Шпанија е последна шанса за Роналд Куман да си ја спаси својата работа како тренер на каталонскиот гигант.

Холанѓанецот вчера одработи една од најнеобичните прес-конференции во поновата историја и го напушти прес-центарот откако го прочита соопштението кое го имаше подготвено, сценарио кое не било најавено во клубот и за кое Лапорта дознал непосредно пред излагањето на тренерот на првиот тим.

Лапорта денеска јасно порача дека секој има слобода на изразување и тоа може да го прави како што сака, но се огласи и за иднината на Роналд за кого порача дека „засега ја има довербата од водечките луѓе“.

– Иднината на Куман не зависи од резултатот кој ќе го оствариме оваа вечер. Ние сме зад тренерот, засега стоиме зад него. Куман е тренер на првиот тим на Барса и сакаме работите да тргнат на подобро. Во последен момент дознавме дека ќе прочита соопштение на пресот. Тој има обврска да се појави на пресот и слободен е да бира што ќе каже и какво мислење ќе сподели со јавноста. Ја почитуваме неговата одлука, но и јас и капитените на тимот дознавме непосредно пред случувањето.

– Работата на сите тренери, а не само онаа на Куман е тесно поврзана со резултатите. Во случајот на Барселона, се вклучува и играта на тимот. Куман е наш тренер и денеска стоиме зад него, – порача Лапорта.