Лапорта го активираше планот Б, Барселона конечно го решава „проблемот Олмо“

Првостепениот суд во Барселона ја одби жалбата на Жоан Лапорта и неговиот правен тим и не дозволи регистрација на Дани Олмо во услови кои не ги исполнуваат правилата на Ла Лига, па така каталонскиот великан се најде во крајно незавидна ситуација на три дена пред истекот на 2024-та година.

Барса има обврска да го реши проблемот најдоцна до 31-ви декември во обидот да не дозволи Олмо да стане слободен агент, а последните информации кои доаѓаат од Каталонија одат во позитивен контекст за клубот и навивачите, бидејќи Лапорта на крајот сепак прифатил да го вклучи планот Б.

Претседателот на клубот се согласил да отстапи огромен дел од Вип ложата на реновираниот „Спотифај Камп Ноу“ во период од 20 години во замена за 120 милиони евра, а оваа сума ќе биде доволна Барса конечно да го реши „проблемот Олмо“ и да стави крај на сагата која трае од летниот преоден рок.

Тогаш, Барселона успеа да го регистрира Олмо за првиот дел од сезоната поради тешката повредата на Кристенсен, но беше јасно дека клубот ќе мора да бара ново решение за вториот дел од сезоната.

Како што пренесуваат угледните медиуми од Каталонија, единствено решение останало отстапување на ВИП ложата, па така покрај Олмо, Барселона ќе може да го регистрира и Пау Виктор.