Лацио го освои „Сан Сиро“, Милан врза три порази по ред во Серија А (Видео)

Милан стигна до израмнување со фудбалер помалку на дербито со Лацио, но на крајот се соочи со пенал за гостите во финишот на судиското надополнување.

Римскиот клуб стигна до многу важна победа (1:2) и на тој начин ја продолжи лошата серија на „росонерите“, кои сега врзаа три порази по ред во Серија А и остануваат уште подалеку од местата кои водат во Лигата на шампионите.

Лацио во уште едно одлично издание поведе со голот на Ѕакањи во 28. минута, а неубедливиот Милан не успеваше да стигне до израмнување, за во 67. минута да навлезе во уште поголем проблем со исклучувањето на Павловиќ.

Дури и во таква ситуација, резервистот Чуквуезе успеа да погоди во 85. на асистенција на Леао и го врати Милан барем во ситуација да освои бод, но домашниот состав не успеа да го направи тоа.

Во последниот напад, Мањан го собра Исаксен, судијата доби повик од ВАР собата и покажа на белата точка, а Педро ги постави конечните 1:2.

Лацио во моментов е на четвртото место со 50 бодови, девет повеќе од Милан и осум помалку од лидерот Интер.

Головите можете да ги погледнете ТУКА